Баян-Өндөр сум 2024 онд Орон Нутгийн Хөгжлийн Сангийн хөрөнгө оруулалтаар 80-н хүүхдийн дотуур байрны хатуу зөөлөн эдлэлийг шинэчлэлээ. Уг ажлыг 18.920.000/Арван найман сая есөн зуун хорин мянган/ төгрөгний санхүүжилтээр “Гэрэлт Мандал Шим ХХК”гүйцэтгэлээ. 80-н хүүхдийн дотуур байранд 86-н хүүхэд амрах бүхий 2 давхар 43 ширхэг ор 44 ширхэг зөөлөн эдлэлийг хүлээлгэн өглөө.

Аймгийн ОНХС-ын 129442563 ( зуун хорин есөн сая дөрвөн зуун дөчин мянга таван зуун жаран гурван) төгрөгийн хөрөнгө оруулалтаар баригдсан Мал нядалгааны цехийг аймгийн ажлын хэсэг хүлээн авлаа. Нядалгааны цэг нь 12х12 метр хэмжээтэй цутгамал төмөр бетон баганан суурьтай, ган төмөр карказтай сендвичин барилга бөгөөд энэхүү мал нядалгааны цех ажиглалтанд орсноор манай сум нь зах зээлд борлуулах, хүнсэнд хэрэгцээлэх малыг зориулалтын орчинд нядлах боломж бүрдлээ.

ЭМЯ-с энэ онд нийт сумдын Эрүүл мэндийн төвийн 30%-ийг унаажуулах арга хэмжээг зохион байгуулж байгаа бөгөөд манай сум энэхүү хуваарьт багтаж туулах чадвар сайтай Land criuser 78 маркын шинэ машинаа хүлээн авлаа. Та бүхний алтан шар зам нь өлзийтэй байж ажил үйлс нь өөдөө байг.

2023 онд аймгийн төсвийн хөрөнгө оруулалтаар 60сая, сумын төсөв буюу орон нутгийн хөгжлийн сангийн хөрөнгө оруулалтаар 15 сая төгрөг, бүгд 75 сая төгрөгөөр өвсний фонд, хүнсний ногооны зоорь, махны хөргүүртэй зоорийг эрчим хүчээр хангаж, хүчдэлээс алслагдсан Өнгөт хороолол, Гандан хорооллын арын гудамжны хүчдэлийг сайжруулах зорилготой 160 ква хүчин чадалтай дэд станцын өргөтгөлийн ажил хийгдэж ашиглалтад хүлээн авлаа.

2023 онд Баян-Өндөр сумын Эрүүл мэндийн төв нь өөрийн дотоод бололцоог ашиглаж шинээр Шүдний эмчийн орон тоог шийдвэрлэсэн. Үүний хүрээнд Эрүүл мэндийн яамны сайд С. Чинзориг сайдын багцаас шүдний эмнэлгийн керисль, Орон нутгийн хөгжлийн сангийн 15.0 сая төгрөгний санхүүжилтээр шүдний кабинетыг байгуулахад шаардлагатай бусад тоног төхөөрөмж багаж хэрэгслээр хангалаа. Ингэснээр амны хөндий болон шүдний өвчлөл буурах бүрэн боломжтой.

Баян-Өндөр сум 2023 онд Орон Нутгийн Хөгжлийн Сангийн хөрөнгө оруулалтаар шинэ Халуун усны барилга ашиглалтанд орлоо. Уг ажлыг 152.0 сая төгрөгний санхүүжилтээр Девсофт ХХК гүйцэтгэлээ. Шинэ халуун ус нь 1 саун, 3 душтай, 1 чийрэгжүүлэлтийн өрөөтэй бөгөөд чийрэгжүүлэлтийн өрөөг 2024 онд бүрэн тохижуулахаар ажиллаж байна. Жич: Үнийн тариф: Том хүн-5000₮ Хүүхэд-3000₮

Баян-Өндөр сум хүнсний ногооны хэрэгцээгээ орон нутагтаа хангах зорилгоор 2022 онд 80 тонн төмс, хүнсний ногоо хадгалах хүчин чадалтай зоорийг барьж ашиглалтад оруулсан. Төмс, хүнсний ногоог стандартын орчинд хадгалах зорилгоор Орон нутгийн хөгжлийн сангийн 16.759.0 / арван зургаан сая долоон зуун тавин есөн мянга / төгрөгийн хөрөнгөөр “ Бумбат Баян ХХК” тохижуулж хүлээлгэж өгөв.

Засгийн газрын хэрэгжүүлэгч агентлаг Ойн газраас говь хээрийн бүсэд хамгаалалтын ойн зурвас үүсгэх зорилгоор Харзтайн голын хажууд 10 га талбайд 6300 ширхэг мод суулгац тарих 112 сая төгрөгийн төсөвт өртөгтэй захиалгат ажлыг ''Гоо нуга'' ХХК хийж гүйцэтгэлээ. Шинээр тарьсан модны усалгааны асуудлыг тухайн талбайд худаг гаргаж, хөрсний устай хослуулан хэрэглэж, шийдвэрлэхээр төлөвлөн ажиллаж байна.

Аймгийн төсвийн хөрөнгө оруулалтаар энэ онд ерөнхий боловсролын дунд сургуулийн нүүрэн тал, Б блокын дээвэр засварын ажлыг 78574278 төгрөгийн санхүүжилтээр Цаст тэргүүн канстракшин ХХК хийж гүйцэтгэн хүлээлгэн өглөө.

Орон нутгийн давсан орлогоос 19.5сая төгрөгөөр сумын цагдаагийн хэсэгт 2015 онд үйлдвэрлэгдсэн шинээр орж ирсэн Probox маркийн тээврийн хэрэгслийг тоноглож сумын удирдлагууд Хэсгийн төлөөлөгч, цагдаагийн ахлах дэслэгч Д.Ганхүлэгт хүлээлгэн өглөө. Алтан шар зам нь өлзийтэй байх болтугай.

2022 оны ОНХС-гийн хөрөнгөөр 18752.0. ( арван найман сая долоон зуун тавин хоёр мянган) төгрөгний шаардлагатай байсан тоног төхөөрөмж, багаж хэрэгсэлээр хангалаа. Ингэснээр ЭМТ-ийн анхан шатны тусламж үйлчилгээний чанар хүртээмж нэмэгдэх боломж бүрдэж байна. Тухайлбал уламжлалт анагаах ухааны эмчилгээний нэр төрлүүд нэмэгдсэн. Мөн 2022 онд сургуулийн болон сургуулийн өмнөх боловсролд хамрагдаж байгаа хүүхдүүдийн 80 орчим хувьд шүдний цоорол, шүдний өвчлөлтэй болох нь эрт илрүүлэг, үзлэгээр оншлогдсон тул 2023 онд ОНХС-ийн 28.3 сая төгрөгөөр шүдний кабенит байгуулахаар төсөвлөсөн байна. Шүдний кабенит байгуулагдснаар амны хөндийн болон шүдний өвчлөл буурах бүрэн боломжтой. Мөн энэ онд шүдний эмчтэй болохоор төлөвлөж байна. Одоогоор ЭМТ нь их эмч-3, бага эмч-5, сувилагч-4, асрагч-3, тогооч-1, жолооч-1, бусад мэргэжилтэн-4 бүгд 21 орон тоотой ажиллаж байна.

Баян-Өндөр сумын малчид малаа зах зээлийн эргэлтэд оруулах, зарж борлуулах тал дээр онцгой анхаарч, Улаанбаатар хотын “Эмээлт” зах, “Хүчит шонхор” худалдааны төвийн томоохон нийлүүлэлтийг бүрдүүлдэг. Тодруулбал, манай сумын малчид жилийн аль ч цаг үед дээрх зах, худалдааны төвүүд дээр мал, махны байнгын худалдаа эрхэлж, тогтмол нийлүүлэлтийг хийж, зах зээлийн харилцаанд идэвхтэй оролцдог. Энэхүү байнгын нийлүүлэлтийн үзүүлэлтээрээ аймаг төдийгүй улсын хэмжээнд онцлог бүхий сум гэж үзэж болно. Иймд малчдын орлого, амьжиргааг дэмжих, дээрх нийлүүлэлтийг илүү үр өгөөжтэй байлгах, бэлтгэсэн махаа зах зээлийн тааламжтай үед борлуулах боломжоор хангах үүднээс сумын 2022 оны төсвөөр буюу Орон нутгийн хөгжлийн сангийн хөрөнгөөр 40 тоннын багтаамжтай, махны гүн хөлдөөгчтэй стандарт зоорийг хүлээн авлаа. Махны зоорь, Хүнсний ногооны зоорь, Өвсний фонд нэг байршилд буюу хуучнаар Өвсний хашааны дэнж дээр төвлөрч байна. Мөн ''Бумбатпүүлэг'' хоршооны үнээний ферм хөдөө аж ахуйн цогцолбор байдлаар зэргэлдээ байрлаж байгаа юм. Махны зоорийг хүлээлгэн өгч, Хүнсний зоорь, Өвсний фондын хамтаар 312 м хашаагаар хашаажуулах ажлыг ОНХС-ын 88,912.,400.0 төгрөгийн хөрөнгөөр ''ИДДУМ'' ХХК хийж гүйцэтгэв. Цаашид энэ цогцолборт Өвс хураах саравч, Мал нядалгааны цэг барьж байгуулахаар төлөвлөж байна.

Орон нутгийн хөгжлийн сангийн 5.2 сая төгрөгийн эх үүсвэрээр сургуулийн өмнөх боловсролын байгууллагыг иж бүрэн камержууллаа. Уг ажлын хүрээнд сууриллуулсан 14 камер нь орчин үеийн НР загварын дуу, дүрс бичдэг хөдөлгөөн мэдрэгчтэй камер бөгөөд 30 хоног бичлэгээ хадгалах боломжтой.

Баян-Өндөр сум хүнсний ногооны хэрэгцээгээ орон нутагтаа хангах зорилгоор өнөө жил 80 тонн төмс, хүнсний ногоо хадгалах хүчин чадалтай зоорийг барьж байгуулж, ашиглалтад оруулав. Уг хүнсний ногооны зоорийг “Зах зээл ба бэлчээрийн удирдлага” төсөл ба Орон нутгийн хөгжлийн сангаас 50, 50 хувиар санхүүжүүлж; нийт 78,181,623.0 төгрөгийн төсөвт өртгөөр “Отгон Минж” ХХК 2022 оны 6 сарын 20-доос 8 сарын 20-дын хугацаанд барьж байгуулсныг Өвөрхангай аймгийн Засаг даргын захирамжаар байгуулагдсан Ажлын хэсэг энэ оны 9 дүгээр сард хүлээн авсан болно. Хүнсний ногооны зоорь нь хуучнаар Өвсний хашаа буюу өнөө жил байгуулсан Өвсний фондтой зэргэлдээ байрлалд цахилгаан эрчим хүчээр нэг дор хангагдсан бөгөөд зориулалтын агааржуулалтын хоолойтой, өвлийн улиралд +3-аас 0 хэмийн стандартаар дулаан хадгалах юм. Дулааны улиралд малчид айраг цагаан идээ хадгалахад мөн тохиромжтой. Цаашид хадгалалтын модон тавиуртай болгох ажлыг төлөвлөж байна. Мөн энэ байршилд мах хөлдөөх зориулалт бүхий 40 тонны багтаамжтай, хөргүүртэй агуулахыг Орон нутгийн хөгжлийн сангийн 88.9 сая төгрөгийн санхүүжилтээр барьж байгуулах ажил энэ долоо хоногт эхэлж, одоогоор Өвсний фонд, Хүнсний ногооны зоорь, Махны агуулахыг нийтэд нь хашаажуулах ажил хийгдэж байна.

Баян-Өндөр сумын сургууль, цэцэрлэг, дотуур байрны ариун цэврийн ба цэвэрлэх байгууламж буюу цэвэр, бохир усны инженерийн шугам сүлжээний бүтээн байгуулалт “Эрдэнэт” үйлдвэрийн нийгмийн хариуцлагын ажлын хүрээнд 2022 онд хийгдэж байна. Уг бүтээн байгуулалтын ажил хийгдсэнээр Ерөнхий боловсролын сургуулийн 2 барилга, Сурагчийн дотуур байрны 3 барилга, Сургуулийн өмнөх боловсролын байгууллагын 1 барилгын боловсон жорлон, угаалтуур, шүршүүрийн халуун усны асуудал бүрэн шийдэгдэх юм. Боловсролын байгууллагын ариун цэврийн болон цэвэрлэх байгууламжийн ажлыг “Эрдэнэт” ТӨҮГ-ын 650.0 сая төгрөгийн санхүүжилтээр “Юу Зэт Эрдэнэ” ХХК гүйцэтгэж, одоогоор ажлын явц 80 хувьтай үргэлжилж байна. Сургуульд 640 сурагч, 70 багш, ажилтан, Дотуур байранд 245 сурагч, 17 багш, ажилтан, Цэцэрлэгт 125 хүүхэд, 18 багш, ажилтан буюу давхардсан тоогоор 1115 багш, сурагч сурч боловсорч, ажиллаж амьдарч байгаа юм. Ташрамд дурдахад, Баян-Өндөр сумын Сурагчийн дотуур байранд 245 сурагч хамрагддаг ба дотуур байрны хамрагдалт, ашиглалтын энэ үзүүлэлтээрээ Өвөрхангай аймагтаа төдийгүй улсын хэмжээнд өндөрт тооцогддог. Мөн манай сумын сургуульд өөрийн сумын төдийгүй Улаанбаатар хот, Өвөрхангай аймгийн Сант, Баянгол, Есөнзүйл, Бүрд, Булган аймгийн Гурванбулаг, Төв аймгийн Дэлгэрхаан, Эрдэнэсант, Өндөрширээт, Дундговь аймгийн Эрдэнэдалай сумын харьяалалтай нийт 4 аймгийн 9 сум, нийслэлийн харьяалалтай 53 сурагч хамрагдан суралцаж байна.

Бэлчээрийн усан хангамжийг сайжруулах ажлын хүрээнд Улсын төсвийн хөрөнгөөр Ботгоны гол /3-р баг/, Асар /5-р баг/, Халиун /2-р баг/-д гүний худаг гаргалаа. Ботгоны голын баруун хажуугийн худгийг 25,480,000.0 төгрөгөөр ''Баянговь ус'' ХХК, Асарын худгийг 31.0 сая төгрөгөөр ''Монтего'' ХХК, Халиуны худгийг 28,553,000.0 төгрөгөөр ''Эко гео'' ХХК гаргав. Халиуны худгийн цооногийг гаргаж бэлтгэсэн ба ирэх хавар барилгын ажил хийгдэнэ.

ХҮҮХДИЙН ТОГЛООМЫН ТАЛБАЙГ ТОХИЖУУЛАВ /Орон нутгийн хөгжлийн сангийн хөрөнгөөр/ Сургууль, сургуулийн дотуур байрны дундах хүүхдийн тоглоомын талбайг 2022 оны Орон нутгийн хөгжлийн сангийн 24,498,000.0 төгрөгийн хөрөнгөөр “МСДОС” ХХК гүйцэтгэж хүлээлгэн өгөв.

Баян-Өндөр сумын сургуулийн 100 хүүхдийн дотуур байрны дээврээс сүүлийн 2 жилийн хугацаанд дусаал дусаж, дотоод засвараа муутган, өвөлдөө цан цохиж, хөлдөлт үүсэж байсныг өнөө жил засаж, хар цаасан дээврийг мембран дээврээр 100 хувь сольж шинэчлэв. Мембран материалыг 50 жилийн эдэлгээтэй гэж үздэг ажээ. Мөн гал тогооны хэсэгт 1 агааржуулалтын хоолой байсан нь хүчин чадлаа дийлдэггүйн улмаас уураас үүдэлтэй хөлрөлт бий болох, цантах, хөлдөх, эрүүл ахуйн стандарт шаардлагад нийцэхгүй явдал байсан тул агааржуулалтын хоолойг 3 болгон нэмэгдүүлэв. Гал тогооны өрөө нь тогоо тус бүр дээрээ агаарын хоолойтой байх стандарттай бөгөөд 900 метр куб талбайн уур сорох төхөөрөмж шинээр суурилуулж, агааржуулалтын хоолойнуудыг нэмж байгуулсан юм. Дотуур байрны дээврийн 570 м.кв талбай, гал тогооны 3 агааржуулалтын хоолой, 900 м.куб уур сорох төхөөрөмжийн шинэчлэлийн ажлыг аймгийн төсвийн 44,256,000.0 төгрөгийн санхүүжилтээр 2022 оны 9 дүгээр сарын сарын 01-нээс 30-ны өдрийн хооронд “Отгон Нинж” ХХК гүйцэтгэснийг Өвөрхангай аймгийн Засаг даргын захирамжаар байгуулагдсан Ажлын хэсэг хүлээн авсан болно.

Аймгийн төсвийн 25.0 сая төгрөгийн хөрөнгө оруулалтаар Соёлын төвийн засварын ажил хийгдэж дууслаа. Засварын ажлаар Соёлын төвийн тайз, хуучин Кино механикийн өрөөг засварласан болно. Соёлын төвийн тайз цөмөрсөн, дай хоорондын зай их байснаас хөдөлгөөн ихтэй байсныг дайг ойртуулан банзыг шахаж, хугарсан банзнуудыг шинэчлэв. Мөн Соёлын төв баригдсан цагаас хойш Кино механикийн өрөөг анх удаа засварт оруулж байна. Энэхүү танхимыг “Орон нутаг судлах музей” болгон тохижуулах юм. Соёлын төвийн засварын ажлыг 2022 оны 9 дүгээр сарын 01-нээс 30-ны өдрүүдэд “Хүүшийн гэгээ” ХХК гүйцэтгэсэн бөгөөд Өвөрхангай аймгийн Засаг даргын захирамжаар байгуулагдсан Газрын харилцаа, барилга хот байгуулалтын газрын дарга Ариунболд ахлагчтай ажил хүлээлцэх комисс гүйцэтгэсэн засварын ажилтай биечлэн танилцаж, 2022 оны 9 дүгээр сарын 30-ны өдөр холбогдох дүрэм журмын дагуу албан ёсоор хүлээн авсан болно.

Сургуулийн өмнөх боловсролын байгууллагын 712 м.кв дээврийн төмрийг сольж, цэцэрлэгийн өөрийн хөрөнгөөр унь мод, таазны дай, шувуу нурууны хугархайг засаж янзлуулав. Уг ажлыг аймгийн төсвийн 15.0 сая төгрөгийн санхүүжилтээр 2022 оны 8 дугаар сард “Хүүшийн гэгээ” ХХК хийж гүйцэтгэсэн бөгөөд тус цэцэрлэгийн барилга 2003 онд баригдсан цагаасаа хойш засвар ороогүйн улмаас зүүн хойд талаараа дусаал гоожиж, дотоод засал чимэглэл, тохижилтод эрсдэл учраад байсан юм. Өвөрхангай аймгийн Баян-Өндөр сумын цэцэрлэг нь 125 хүүхэд, 15 бүлэг, 18 багш, ажилтантайгаар үйл ажиллагаа явуулж буй бөгөөд 2022 оны 10 дугаар сард “Аймгийн тэргүүний цэцэрлэг”-ээр шалгарсан. Баян-Өндөр сумын цэцэрлэг нь гадаад, дотоод тохижилт, засал чимэглэл, хичээлийн хэрэглэгдэхүүн, багш, ажилтнуудын ур чадвар, бүтээлч үйл ажиллагаагаараа аймаг төдийгүй улсын хэмжээнд үлгэр жишээ болохуйц шилдэг цэцэрлэг гэдгийг дурдах нь зүйтэй.