2023.05.13-ны Бямба гарагт сумын Аварга шалгаруулах үндэсний шагайн харвааны тэмцээнийг М.Ихзориг агсны нэрэмжит болгон зохион байгууллаа. Уг тэмцээнд нийт 5 багийн 45 тамирчин оролцлоо. Тэмцээний дүн гарахад багууд харилцан биенээ хожиж оноо тэнцсэн учир сум уралдаж 1 дүгээр байранд Л.Батсүх ахлагчтай ахмадын баг, 2 дугаар байранд Э.Бумбаяр ахлагчтай ЕБС-ийн баг, 3 дугаар байранд Д.Төмөрбаатар ахлагчтай Залуучуудын баг шалгарлаа. Мөн цуваа харвааны тэмцээнд 1 дүгээр байранд Монгол улсын мэргэн Д.Төмөрбаатар 2 дугаар байранд ЕБС-ийн 12 дугаар ангийн С.Жамъяансүрэн 3 дугаар байранд ахмад харваач Ө.Энхжаргал 4 дүгээр байранд Аймгийн гоц мэргэн Д.Батболд 5 дугаар байранд Шонхор багийн харваач Даансранламжиг нар шалгарлаа. Энэхүү тэмцээнийг М.Ихзориг агсны гэргий Б.Соёл-Эрдэнийн гэр бүл-1 сая төгрөгөөр 1 дүгээр багийн малчин Лувсандагвын Бат-Эрдэнэ, Батшатарын Баасансүрэн, Арвай-Илч ХХК-ны захирал Батсүхийн Батмөнх нар тус бүр 500.0 ( таван зуун мянга ) төгрөгөөр ивээн тэтгэлээ. Тэмцээнийг ивээн тэтгэсэн болон нийт оролцсон харваачиддаа баярлалаа.

Хүнсний хангамжийг нэмэгдүүлэх жилийн хүрээнд төмсний үрийн захиалга авч байна. 1кг төмсний үр 1000төгрөг. Мөн улаан манжин, хүрэн манжин, сармис, төл сонгино, өргөст хэмх, улаан лооль, лууван, чинжүү, бууцай, байцааны үрийг 80 хувийн хөнгөлттэй үнээр Хөдөө аж ахуйн тасгийн мэргэжилтэн Г.Бадьмэдээс авна уу. Төмс хүний ногооны хэрэгцээний тодорхой хувийг орон нутагтаа бэлтгэдэг болоход иргэн таны оролцоо чухал юм.

Өвөрхангай аймгийн хэмжээнд малчдыг өвөлжөөнийхөө дэргэд 1000 метр квадрат талбайд малын тэжээлийн ургамал тариалах газрын асуудлыг шийдэж өгсөн. Иймд малчдаас өвөлжөөндөө болон өвөлжөөний орчимд малын тэжээл тариалах үрийн захиалга авч байна. Захиалгаа сумын хөдөө аж ахуйн тасгийн мэргэжилтнүүдэд, багийн Засаг даргадаа өгнө үү. Өнгөрсөн жилд манай сумаас хэд хэдэн малчид энэхүү арга туршилгыг нэвтрүүлсэн бөгөөд эдгээрийн нэг жишээ нь 1 дүгээр багийн малчин Р.Төмөрпүрэв, Т.Энхбаяр, нарын гэр бүл юм. Эдгээр малчид өвөлжөөндөө малын тэжээл тарьж арвин их ургац хураан авч байсан.

☑️Хүнсний аюулгүй байдлыг хангах, өрхийн үйлдвэрлэлийг хөгжүүлэх, орлогыг нэмэгдүүлэх, иргэд, олон нийтийг чадавхжуулах, зөв дадлыг хэвшүүлэх, үүнд орон нутгаас дэмжлэг үзүүлэх нь зорилтот жилийн гол зорилго юм. ☑️2024 онд Түүхт 100-н жилийн ойг угтаж Сумын иргэдийн Төлөөлөгчдийн 2022.12.08-ны өдрийн ээлжит хуралдаанаар 2023 оныг сумын төвийн тохижилтын жил болгон зарласан. Үүний хүрээнд: Иргэдийн өмчлөл, эзэмшилд байгаа хашаа, гудамж, хороолол, худалдаа, үйлчилгээний газруудын гадна талбайн нэгдсэн стандартыг батлан стандартыг мөрдүүлэх ажил эхлэнэ. Мөн тохижилтын холбогдох журмын хүрээнд батлагдсан болзолт уралдааныг зарлаад байна.

Аймаг дундын отрын бэлчээр ашиглалтын захиргаатай хамтран малын сэг зэм устгаж байгаатай холбогдуулан малчид иргэд та бүхэн өөрсдийн малын бэлчээрт байгаа сэг зэмийг тусгайлан ухаж бэлтгэсэн (хогийн цэгийн хашааны гадна зүүн хойд талд) нүхэнд авч ирж хаяна уу!!! ТУХАЙН НҮХЭНД ХАЛДВАРГҮЙЖҮҮЛЭЛТ ХИЙЖ ЗОРИУЛАЛТЫН ДАГУУ БУЛЖ УСТГАХ БОЛНО... ХОГИЙН ЦЭГИЙН НҮХЭНД, СУМЫН ТӨВИЙН ОЙР ОРЧИМД МАЛЫН СЭГ ЗЭМ ХАЯХГҮЙ БАЙХЫГ ЗӨВЛӨЖ БАЙНА.

Баян-Өндөр суман дахь авто тээврийн хяналтын үзлэг 2023.04.17-19-ний өдрүүдэд болно. Үзлэгийн үеэр иргэн Та тээврийн хэрэгслээ хяналтын үзлэгт оруулахаас гадна нэр шилжүүлэх, тээврийн хэрэгслийг бүртгүүлж, улсын дугаар авах, хасалт хийлгэх, улсын дугаар шинээр авах болон солих зэрэг үйлчилгээг авах боломжтой. Та тээврийн хэрэгслийн хяналтын үзлэгтээ идэвхтэй хамрагдана уу. АЖЛЫН ХЭСЭГ.

Аймгийн иргэдийн төлөөлөгчдийн Хурлын 2023 оны Хүнсний хангамжийг нэмэгдүүлэх зорилтот жилийн хүрээнд Герман монголын хамтын ажиллагааны тогтвортой хөдөө аж ахуй” төсөл, Хүнс хөдөө аж ахуй, хөнгөн үйлдвэрийн судалгааны хөгжлийн төв, Аймгийн хүнс хөдөө аж ахуйн газар, Баян-Өндөр сумын ЗДТГ хамтран тариалан эрхлэгчдийн сургалт, зөвлөгөөнийг зохион байгуулж байна. Зөвлөгөөнд ХХААХҮ-ын сайдын зөвлөх Б.Батбаатар, Аймгийн ХХААГазрын дарга С. Цэдэнбалжир, Герман Монголын тогтвортой ХАА төслийн зөвлөх Доктор Б.Эрдэнэболор, ХХААХҮЯ-ны СХТ-ийн ахлах мэргэжилтэн С.Нандинцэцэг, Архангай, Булган, Дорнод, Нийслэлийн ХХААГ-ын агрономчид оролцож малчид тариаланчдад үнэтэй зөвлөгөө өгч, хөдөө аж ахуй, газар тариалангын чиглэлээр хэрэгжих боломжтой төсөл хөтөлбөрүүд тарих технологийг танилцуулж байна.

2015 онд Баян-Өндөр, Есөнзүйл сумын нутагт олгогдсон Жаран нэртэй хайгуулын тусгай зөвшөөрлийн байгаль орчныг хамгаалах менежментийн 2020, 2021, 2022 оны төлөвлөгөөг батлахыг Баян-Өндөр, Есөнзүйл сумдын Засаг дарга нарт даалгах нэхэмжлэлтэй хурал Архангай аймгийн захиргааны хэргийн шүүхэд 2023.04.03-ны даваа гарагт боллоо. 5 цаг 10 минут үргэлжилсэн шүүх хуралд сумын Засаг дарга С.Чулууншагай, Есөнзүйл сумын Засаг даргын итгэмжлэгдсэн төлөөлөгч Т.Оюунчимэгтэй хамтран хариуцагч талыг төлөөлж оролцлоо. Шүүхээс нэхэмжлэгчийн нэхэмжлэлийн шаардлагыг бүхэлд нь хэрэгсэхгүй болгож шийдвэрлэлээ. Одоо давж заалдах шатны шүүх дээр ялчихвал нэг ч гэсэн лиценз цуцлагдах нөхцөл бүрдэж байна.

Зүүн бүсийн Баян-Өндөр, Бүрд, Өлзийт, Сант сумдын 8 багийн 60 гаруй харваачид цэц мэргэнээ сорьж өрсөлдөж байна.

Сумын иргэдийн Төлөөлөгчдийн Хурлын ээлжит 12 дугаар хуралдаан 2023 оны 03 сарын 30-ны өдрийн 10 цагт ЗДТГ-ын иргэний танхимд 61.9% ийн ирцтэй хуралдлаа. 1. Сумын иргэдийн Төлөөлөгчдийн хурлын зөвлөлийг шинэчлэн байгууллаа. 2. Сумын иргэний хяналтын багийн бүрэлдхүүнийг шинэчлэн байгууллаа. 3. Шимэгчтэх өвчнөөс урьдчилан сэргийлэх арга хэмжээний 2023 оны төлөвлөгөө баталлаа. 4. “Хүнсний хангамжийг нэмэгдүүлэх зорилтот жилийн ажлын төлөвлөгөөг баталлаа. 5. Сумын Түүхт 100-н жилийн ойг угтсан “Тохижилтын жил”-ийн ажлын төлөвлөгөө баталлаа. 6. Хууль зүй дотоод хэргийн яам, Азийн хөгжлийн банктай хамтран зарласан ”Бичил төсөл”-ийн “Гэр бүл, хүүхдийн эсрэг хүчирхийлэлээс урьдчилан сэргийлэх, таслах зогсоох нөлөөллийн ажлыг сайжруулах нь” төслөөр хийгдсэн ажлууд, ажлын гүйцэтгэл, үр дүнгийн тайланг сонсож танилцлаа. 7. Аймгийн тэргүүлэх чиглэлтэй уялдуулан хоршоог хөгжүүлэх сангаас хөнгөлөлттэй зээл олгох салбар, чиглэлийг тогтоож баталлаа. 8. Хоршоо хөгжүүлэх сангаас олгосон зээлийн хүүгийн тухайн жилийн орлогыг журамд заасны дагуу зарцуулах саналыг баталлаа. 9. Өвөрхангай аймгийн засаг даргын 1/112 тоот албан бичгийн хариуг хүргүүлэх / Ашигт малтмал газрын тосны газраас ирсэн албан бичигт/ төлөөлөгчдийн 100%ийн саналаар дэмжихгүй байгааагаа мэдэгдэж аймгийн засаг дарга, зохих шатны байгуулагад тогтоол шийдвэрийг хүргүүлэхээр тогтлоо. ИРГЭДИЙН ТӨЛӨӨЛӨГЧДИЙН ХУРАЛ

Сумын онцгой комиссын 2023.03.29-ний өдрийн шийдвэрээр малчин, мал бүхий өрхүүдэд сумын аюулгүй нөөцөд байгаа малын өвс тэжээлийг 2023.03.30-2023.04.21-ний өдрийг хүртэл зээлээр олгохоор шийдвэрлэлээ. Өвс, ногоон тэжээл-15000₮, Рапс-7000₮, Багсармал тэжээл-10000₮, Няцалсан будаа-20000₮, Овъёос, тэжээлийн будаа-30000₮-р тооцож нийт 500.0( таван зуун мянга) хүртэл төгрөгний өвс тэжээл зээл олгоно. 2021 оны малын тоо толгойн албан татвараа төлсөн, 2021 оны эрсдэлээс хамгаалах сангаас авсан өвс, тэжээлийн өргүй малчин, мал бүхий өрхүүд тухайн зээлийг малчны тамга, иргэний үнэмлэхтэйгээ ирж гэрээ байгуулан авч болно. Зээлээр авсан өвс, тэжээлийн үнийг 2023.05.20-ны өдрийн дотор төлж болно. Хэрэв зээлийг хугацаанд нь төлөөгүй тохиолдолд одоо зарагдаж байгаа үндсэн үнээр нь буюу гэрээнд заасан үнээр төлөгдөхийг анхаарна уу. СУМЫН ОНЦГОЙ КОМИСС

Сумын иргэдийн Төлөөлөгчдийн 2022.12.08-ны өдрийн ээлжит хуралдаанаар 2023 оныг сумын төвийн тохижилтын жил болгон зарласан. Үүний хүрээнд: 1. Иргэдийн өмчлөл, эзэмшилд байгаа хашаа, гудамж, хороолол, худалдаа, үйлчилгээний газруудын гадна талбайн нэгдсэн стандартыг батласан. 2. Мөн тохижилтын холбогдох журмыг баталж болзолт уралдааныг зарлаад байна. Иймд иргэн таны санаачилгатай үйлдэл нь сум орон нутгийн өнгө үзэмжинд үнэтэй нэмэр оруулна гэдгээ ухамсарлан идэвхитэй оролцоно уу.

Баян-Өндөр сум, Байгаль орчны төлөөх хуульчдын холбооны нэхэмжлэлтэй Ашигт малтмал, газрын тосны газарт холбогдох анхан шатны шүүхээс гаргасан шийдвэрийг Захиргааны хэргийн давж заалдах шатны шүүхээс хүчингүй болгож, анхан шатны шүүхээр ахин хэлэлцүүлэхээр боллоо. Давж заалдах шатны шүүхээс Анхан шатны шүүх дээр нотлох баримтыг дутуу бүрдүүлсэн, үнэлсэн, маргалдаж байгаа асуудлаар дүгнэлт гаргаагүй гэсэн үндэслэлээр Анхан шатны шүүхээр дахин хэлэлцүүлэхээр буцаасан юм. Шүүх хуралд танхимаар нэхэмжлэгч талыг төлөөлж, аймгийн иргэдийн Төлөөлөгчдийн Хурлын төлөөлөгч С.Чулуунпүрэв, Үнэн ба зөв намын дарга А.Отгонбаатар, нэхэмжлэгчийн төлөөлөгч, өмгөөлөгч Л.Батмөнх, Байгаль орчны төлөөх хуульчдын холбооны тэргүүн Ш.Жаргалсайхан, өмгөөлөгч Ц.Туяацэцэг, цахимаар Баян-Өндөр сумын Засаг дарга С.Чулууншагай, ажиглагчаар Батхаан багийн харьяат Н.Жадамба нар оролцлоо. Хэрэг маргаан анхан шатны шүүх дээр үргэлжлэхээр болсон тул нутаг орныхоо төлөө санаа тавьж явдаг Та бүхнээс энэ маргаан дээр бүх талаар тусалж дэмжих, хамтран ажиллахыг хүсэж байна. Шүүхийн маргаанд мэдлэг туршлагаа дайчлан хамтран ажиллаж байгаа БОТХХ-ны тэргүүн Ш.Жаргалсайхан, хуульч, өмгөөлөгч Ц.Туяацэцэг, хэрэгт чухал нотлох баримтын үндэслэл гарган бүрдүүлэхэд зүтгэл гарган хамтран ажилласан Бүрд сумын ИТХ-ын дарга М.Дэжид, Засаг дарга М.Мөнхбаяр нарт талархал илэрхийлье. Chuluunshagai Sodnom С. Чулуунпүрэв Төр овогт Аюурзаны Отгонбаатар Sandagdawaa Bayanjargal, Дэжид Мөнхөө, Manaljav Munkhbayar, Л. Батмөнх, Б. Батжаргал, Нанзад Гаа Жадамба

Өвөрхангай аймгийн Баян-Өндөр сумын иргэдийн Төлөөлөгчдийн хурлаас 2022.12.08-ны өдрийн 19 дүгээр тогтоолоор сумын бэлгэдэл ЛОГО шинэчлэхээр тогтсон. Үүний хүрээнд сумын бэлгэдэл лого солих уралдааныг нээлттэй зарлаж байна. Мөн сумын түүхт 100 жилийн ой угтсан дурсгалын медалийн загвар шалгаруулах тул та бүхэн бүтээлээ удирдамжинд заасны дагуу бэлтгэж 2023.05.26-ны 17 цаг хүртэл bayanundur@ov.gov.mn хаягаар ирүүлээрэй. Утас 99023958, 85110598, 99043867

Монгол улсын гавьяат дасгалжуулагч, монгол улсын арслан Б.Ганбаатарын нэрэмжит 2023 оны сумын аварга шалгаруулах үндэсний бөхийн барилдаан 2023.03.17-18 өдрүүдэд амжилттай зохион байгуулагдаж өндөрлөлөө. Нээлтийн барилдаанд 32 бөх барилдаж Аймгийн арслан Т.Довчинсэмбээ түрүүлж сумын заан Ц.Дамдинбазар үзүүрлэж, шөвгийн дөрөвт сумын заан Б.Мөнхбат, сумын начин Б. Даваахүү нар шалгарлаа. Сумын аварга шалгаруулах тойргийн барилдаанд 1-р байр а.а Т.Довчинсэмбээ 2-р байр с.з Ц.Дамдинбазар 3-р байр с.з Х.Батням 4-р байр с.н Б.Даваахүү 5-р байр с.з Ч.Зинамэдэр 6-р байр с.з С.Батжаргал 7-р байр с.н Л.Эрхэмбаяр 8-р байр с.н Ц.Амгаланбаатар нар шалгарлаа. Тэмцээнийг Бумбат пүүлэг хоршооны захирал Д.Зинамидэр, 5-р багийн малчин Д.Отгонболд, Г.Гантулга нар тус бүр 500.0 төгрөгөөр ивээн тэтгэлээ. Ивээн тэтгэсэн болон оролцсон бөхчүүддээ талархал илэрхийлье.

🇲🇳🇲🇳Өвөрхангай аймгийн Баян-Өндөр сумын Улаанбаатар хот дахь нутгийн зөвлөлийн "Үзэсгэлэн болгогч" хэмээх усан туулай жилийн "САР ШИНИЙН ЗОЛГОЛТ, УУЛЗАЛТ" нутгийн ахмад буурлууд, зон олон өргөнөөр оролцож амжилттай зохион байгуулагдлаа✅✅ Золголтын үйл ажиллагаанд сумын уугуул 180 гаруй иргэд хүрэлцэн ирлээ. Золголтын үйл ажиллагаанд хүрэлцэн ирсэн нийт иргэддээ талархал илэрхийлье.

Монгол улсын гавьяат дасгалжуулагч, монгол улсын арслан Б.Ганбаатарын нэрэмжит 2023 оны сумын аварга шалгаруулах үндэсний бөхийн барилдаан 2023.03.17-18 өдрүүдэд амжилттай зохион байгуулагдаж өндөрлөлөө. Нээлтийн барилдаанд 32 бөх барилдаж Аймгийн арслан Т.Довчинсэмбээ түрүүлж сумын заан Ц.Дамдинбазар үзүүрлэж, шөвгийн дөрөвт сумын заан Б.Мөнхбат, сумын начин Б. Даваахүү нар шалгарлаа. Сумын аварга шалгаруулах тойргийн барилдаанд 1-р байр а.а Т.Довчинсэмбээ 2-р байр с.з Ц.Дамдинбазар 3-р байр с.з Х.Батням 4-р байр с.н Б.Даваахүү 5-р байр с.з Ч.Зинамэдэр 6-р байр с.з С.Батжаргал 7-р байр с.н Л.Эрхэмбаяр 8-р байр с.н Ц.Амгаланбаатар нар шалгарлаа. Тэмцээнийг Бумбат пүүлэг хоршооны захирал Д.Зинамидэр, 5-р багийн малчин Д.Отгонболд, Г.Гантулга нар тус бүр 500.0 төгрөгөөр ивээн тэтгэлээ. Ивээн тэтгэсэн болон оролцсон бөхчүүддээ талархал илэрхийлье.

Сумын эмэгтэйчүүдийн холбооноос санаачлан ЗДТГазар, ИТХ-аас хамтран зохион байгуулсан "НАРАН ЭЭЖ”хүндэтгэлийн арга хэмжээ болж байна. Хүрэлцэн ирсэн бүх сайхан эмэгтэйчүүд ,бүсгүйчүүд, ээжүүд та бүхэндээ баярлалаа. Олон Улсын Эмэгтэйчүүдийн Эрхийг Хамгаалах" өдөр #МАРТЫН_8-ны баярын мэндийг хүргэе. Амьдрал тань хайраар бялхаж, ажил үйлс тань амжилтаар дүүрэн байхын ерөөлийг дэвшүүлье. 🌹💖🥀 💐🌷 Зохион байгуулж буй ЭМЭГТЭЙЧҮҮДИЙН ХОЛБООНЫ бүсгүйчүүддээ Ажлын амжилт сайн сайхныг хүсье.

2023.03.07-ны өдөр Өвөрхангай аймгийн Арвайхээр хот дахь Баян-Өндөр сумын нутгийн зөвлөлийн золголт амжилттай зохион байгууллагддаа. Уг арга хэмжээг Арвайхээр сум дахь нутгийн зөвлөлөөс зохион байгуулсан бөгөөд уг арга хэмжээнд Баян-Өндөр сумын Засаг дарга, ЗДТГ-ын дарга, ЕБС-ийн захирал нар оролцож 2024 онд тохиох сум, сургуулийн түүхт 100 жилийн ойг угтан хийж буй болон хэрэгжүүлэхээр төлөвлөж байгаа ажлуудаа танилцуулж санал солилцлоо.

XVII жарны "Үзэсгэлэн болгогч" хэмээх харагчин туулай жилийн босгон дээр БАЯН-ӨНДӨР сумаас 6 малчин өрх ХХААХҮЯ, МҮОНРТ-ээс шалгаруулдаг АЛТАН ТӨЛИЙН ЭЗНЭЭР тодорлоо. 🐎🐫🐂🐑🐐 1. Бөмбий багийн малчин, аймгийн аварга малчин өрх Долгорсүрэнгийн Пүрэвээгийн гэр бүл АЛТАН ХУРГАНЫ ЭЗЭН 🐑 боллоо. 2. Бөмбий багийн малчин, аймгийн аварга малчин өрх Ханхайн Баясгалангийн гэр бүл АЛТАН ХУРГАНЫ ЭЗЭН 🐑 боллоо. 3. Батхаан багийн малчин, сумын аварга малчин өрх Сумъяадоржийн Алтансүхийн гэр бүл АЛТАН УНАГАНЫ ЭЗЭН 🐎 боллоо. 4. Батхаан багийн малчин, сумын аварга малчин өрх Пүрэвдоржийн Лхагва-Очирын гэр бүл АЛТАН ХУРГАНЫ ЭЗЭН 🐑 боллоо. 5. Өвөрзүлэгт багийн малчин, аймгийн аварга малчин өрх Хорлоогийн Бат-Эрдэнийн гэр бүл АЛТАН ИШИГНИЙ 🐐 ЭЗЭН боллоо. 6. Бумбат багийн малчин, аймгийн аварга малчин өрх Цэрэннадмидын Ургацын гэр бүл АЛТАН ХУРГАНЫ ЭЗЭН 🐑 боллоо. Малч, хөдөлмөрч гэр бүлүүддээ эрхэм сайхан бүхнийг хүсэн ерөөж, буянт мал сүрэг нь түм бумаар өсөх болтугай.